رواية_ختم_الملائكة((كاملة جميع الفصول)) للكاتبه لينا بسيوني
واللى كانت مطلعه ضوء أبيض و ساطع .
الطفل كان شعره كثيف جدا وناعم على غير عادة اى طفل فى سنه!!!
مديت أيدى عشان اشيله فلقيته بيمدلى أيده وهو مبتسم .
بصيتله باستغراب و شيلته فلقيت جسمه دافى جدا وبيخرج حرارة لدرجة انه دفى السفينة كلها فى عز السقيع .
اتأكدت ان الطفل دا لا هو انس ولا هو جن دا مخلوق مختلف تماما !!
استنيت لحد ما بعدت عن المنطقة المتجمدة حطيت الطفل فى الصندوق واتحولت لجن واتنقلت بيه وسيبت السفينة فى عرض المحيط .
اتنقلت لكهفى اللى فى مملكة الجنون بليبيا .
أول ما دخلت الكهف لقيت الطفل بيبصلى وبيشاورلى على بوقه ..
انت جعان ! طب مبتعيطش ليه زى العيال لو انت جعان !!
وبعدين انت ازاى رضيع وبتتواصل معايا!!!
اروح اجيبلك لبن ولا انت بتاكل ايه!
مردش عليا وفضل يشاورلى على بوقه.
اختفيت ورحت جبت كل انواع اللبن اللى ممكن تتشرب
لبن جاموسه
لبن بقرة
لبن ماعز
لبن ناقة
لبن ام بشړية ومتقوليش جيبته ازاى دى ضرورة جنية و انسانية.
جربت معاه لبن الماعز والابل تفه فى وشى.
جربت لبن الجاموسه تفه فى وشى برضه.
فاديته لبن الام ..
حرك شفيفه كدا كانه بيستطعم وتفه فى وشى برضه!!
مفيش اى لبن مشى معاه!!
بصيت على الصندوق وافتكرت الكتب اللى فيه قربت على الصندوق وقلت للطفل
فتحت كتاب منهم و اندهشت لما لقيت صفحات الكتاب مش مصنوعه من ورق عادى.. مصنوعة من الريش ريش أبيض غريب غير ريش أى طائر.
اول صفحة من الكتاب كانت عبارة عن خريطة لمكان غريب
الخريطة كانت عبارة عن اربع قطع من اليابسة بيفصل بينهم نهر ومكتوب كلام باللون الاحمر مفهمش منه حاجة.
فتحت كتاب تانى لقيته برضه مصنوع من الريش بس جواه حجر مستطيل وشكله غريب منقوش عليه زى ابجدية أو حروف للغة غريبة
مديت ايدى عشان امسك الحجر ويارتنى ما مسكته.
حسيت ايدى بتولع ڼار فرميت الحجر على الارض لقيته بيغوص فى ارضيه الكهف الصخرية وهو بيدوبها ...
بصيت للطفل وقلتله وانا محتاس
وبعدين بقى فى السحوله دى !! طب يابنى انت بتأكل ايه !!
مردش عليا وفضل برضه يشاورلى على بوقه وشوفت الحزن فى عينه.
قلتله
متزعلش والله انا عايز أاكلك بس مش عارف أاكلك ايه!!!
طب ثوانى هجيبلك كل انواع الاكل واختار انت.
رحت جيبت فاكهة وخضار بكل انواعهم و قمح رز شعير فول بطاطس عدس جزر حتى الحلويات الشرقية.
حطيت الاكل قدامه وقلتله
نقى انت بقى ..
اتفاجأت واټصدمت لما لقيته قام وقف على رجله واتنقل ما بين الاكل.
مد ايده خد خيارة وطمطمايه وقعد.
قلتله
ايه دا هو انت نباتى .. طب عندك سنان تقرقش بيها الخيار دا لا ايه!!
لقيته بيقطم الخيارة وسمعت خروشه الخيار فى بوقه.
بصيتله وسألته وسألت نفسى
ياترى انت ايه حكايتك بالضبط!!
انت استحالة تكون انسان او جن صح ولا ايه !
بصلى وهو مبتسم..
اكل ونام على نفسه وهو فى بوقه الخيار..
شيلته ونيمته على سرير فى الكهف وغطيته..
رحت ناحيه الصندوق والكتب تانى.
فتحت الكتاب اللى فيه الحجر وبصيت عليه من غير ما المسه لقيت عليه نقوش غريبة وتحتها حروف بالاتينيه تقريبا ترجمة للنقوش دى.
عرفت المقصد فجبت ورقه وقلم وبدأت انقل الابجدية بتاعت اللغة الغريبة
